TUISBLAD INLIGTING KONTAK ONS ROETES VIR DIE JAAR
	Stewels vir Voetslaan

As dit kom by die keuse van stewels vir voetslaan, moet daar eerstens gekyk word na iets wat jou voete die beste beskerm, veral jou voetsool. Daarna kan jy kyk na die gewig van die stewel of enkelbeskerming, ens.

Wat beskerm jou voete die beste?
Die sool van jou stewel!

Die belangrikste is om 'n goeie sool (beskerming) onder jou voete te hê. Skerp klippe kan na 'n paar dae se stap genadeloos op jou voete wees en ernstige blase veroorsaak. Onthou, jy moet dalk nog vir kilometers en selfs dae met die blase wat jy opgedoen het stap. Dit veroorsaak dat jy kruppel loop wat nog meer blase kan veroorsaak.

Vir die beskerming van jou voet is 'n goeie sool onder jou voet dus uiters belangrik.

 Verder word stewels ontwerp om ondersteuning te bied aan jou enkels, wat vir sommige stappers baie belangrik is.

Stewels kan baie duur wees. Moet nie net vir die goedkoopste op die mark gaan nie.

Daar is hoofsaaklik twee tipes stewels, sintetiese of leerstewels, of 'n kombinasie van leer en sintetiese materiaal. 'n Leerstewel is gewoonlik duurder en swaarder maar kan ook langer hou. Dit bly ’n persoonlike keuse.

Die stewel moet gemaklik voel, maar pasop vir te sagte stewels wat baie gemaklik voel. Veral sagtesool stewels kan baie gemaklik voel, maar is nie goed genoeg vir voetslaan nie. Dit gaan nie jou voetsole genoegsaam beskerm nie.

Vermy stewels wat nie ’n goed gedefinieerde hak het nie. Die hak is baie belangrik vir voetslaan, veral vir die ernstige stapper. Dit bied jou uiters goeie vastrapplek, veral teen skuinstes en oor gladde klippe in riviere en stroompies. Die hak kan ingehaak word agter skurwe plekke, rande, hoeke, skeure, ens. As jou hak agter die rand van ‘n rots geanker is, staan jy veilig teen enige skuinste of  by ‘n afgrond. Stappers loop dikwels op gevaarlike plekke op voetslaanroetes. Met ander woorde, koop ’n stewel met ’n goed gedefinieerde hak.

                                            
           'n Goeie hak                                     'n Goed gedefinieerde hak in aksie, dit haak vas aan die glade rots in die water.

 Volg hierdie riglyne as jy nuwe stewels aanpas.

1. Trek altwee stewels aan, moenie net een stewel aanpas nie.

2. Gebruik stapkouse om jou stewels aan te pas. Koop eers kouse indien jy nie het nie. Gebruik die kouse waarmee jy gaan voetslaan.

3. Maak die veters behoorlik los, sit jou voete in die stewels, staan regop en stoot jou voete vorentoe tot voor teen die toon van die stewel. Druk nou jou wysvinger tussen jou hak en die stewel in. Dit behoort in te gaan, as dit nie ingaan nie is die stewel te klein. Doen dit met beide stewels.

4. Gaan sit, jou voet sal terug na die hak beweeg. Maak die stewels vas.

5. Staan op en loop rond.

6. Maak seker dat jou tone nie die voorkant van die stewel raak nie. As dit gebeur, probeer ’n groter nommer.

7. Maak ook seker jou tone raak nie die bokant van die stewel nie, indien dit gebeur sal jy stewel met ’n breër voorkant benodig, miskien ’n ½ nommer groter.

8. Tik met die voorkant (toon) van die stewel teen die vloer. Jou voet behoort nie vorentoe te skuif nie, indien dit wel gebeur is die stewel te groot.

9. As jy loop moet beide voete gemaklik voel. As een van jou hakke oplig (“slip”) binne in die stewel is die stewels te groot.

4.      Sommige dames, mag gewoond wees aan noupassende skoene. Stewels vir voetslaan moet gemaklik pas en nie styf aan die voet sit nie.

 Faktore wat die aankoop van stewels beïnvloed:

•  Jou voete verander ietwat in vorm en grootte nadat dit warm gestap is. Dit verskil van persoon tot persoon. Die beste is om jou voete warm te stap vir tenminste 15 minute voor die tyd.

• Moenie te veel aandag gee aan die nommer skoen wat jy dra nie, want jou stewel gaan tien teen een nie dieselfde nommer wees nie. Pas jou stewel aan soos uit in punt 2 beskryf.

• Moenie wag tot jou ou stewels gedaan is voor jy nuwe stewels koop nie. Koop jou nuwe stewels meer as een maand voor die tyd. Loop dit goed in voor die tyd en dra dit daagliks. Doen eers ’n kort naweek roete voor jy ’n lang roete aanpak.

• 'n Waterdigte stewel is belangrik, selfs al beplan jy nie om in water te loop nie. Natgedoude gras maak 'n stewel baie vinnig papnat.

Stewels kan een tot twee nommers groter wees as jou normale skoen wat jy dra, maar dis nie noodwendig die geval nie.
LW. Die beste stewel op aarde is nie waterdig nie as die water dieper is as die bokant van die stewel. Dit gaan bo inloop.

Watter stewel om te koop?

Dit bly jou persoonlike keuse.
Sinteties of leer of kombinasies daarvan?
Almal is goed!
Koop dit waarvan jy hou en wat gemaklik pas.

Aanbeveling:
Die Sool:  ’n Vibram sool is ’n baie hard en bied uiters goeie beskerming aan die voet en voetsool. Nadeel, dit moet goed vooraf ingeloop word. “Vibram” is ’n  geel merk onder aan die sool, maar pasop daar is baie namaaksels.

Vir beide leer of sintetiese stewels is GORTEX ’n goeie aanbeveling. Gortex is slegs ’n eenrigtinglaag wat tussen die leer of sintetiese materiaal en die binnekant van die stewel geplaas word. Dit werk eenrigting, met ander woorde, dit laat vog van binne die stewel uit na buite, maar vog of water van buite word nie ingelaat nie. LW. beide leer sowel as sintetiese stewels kan 'n Gortex laag hê.

Die algemene aanbeveling is dus enige stewel wat ’n harde (egte) Vibram sool het en Gortex eenrigting waterdigting!

’n Uitstekende stewel is “Lasportiva” en daar is verskillende modelle, maar dit is nogal duur. Dit word aanbeveel vir die meer ernstige stapper. Nog goeie stewels is Merrell of Hi-Tec.   

Lasportiva	Merrell	Hi-Tec

Versorging van stapstewels:

Dit is baie belangrik om die winkelassistent te vra hoe om jou stewel te versorg. Nie alle stewels word met dieselfde middels versorg nie, vind uit wat is die beste vir jou stewels.
Die moderne stapstewel kan nie net met gewone politoer of dubbin versorg word nie.
Ons wil dit nie eers waag om enigiets aan te beveel nie, raadpleeg  jou stapstewelwinkel.
Selfs die beste stewel bly nie waterdig nie en dit gaan beslis nodig wees om dit te behandel met 'n waterdigtingmiddel.
Moet nooit jou stewels langs die kampvuur droog maak nie. Dit gaan jou stewel beskadig en die stewel se lewe aansienlik verkort.
Versorg en behandel volgens voorskrif.

Wat van stewels met Gortex laag?
Behandel dit presies dieselfde soos wat jy enige leer- of sintetiese stewel sal behandel. Gortex sal nie beïnvloed word deur enige normale behandelingsmiddels soos politoer of “silicone conditioners” nie.

Indien jy nie weet wat se versorging voorgeskryf is nie gebruik gerus “NIKWAX”. Dis seker die mees algemene produk en goed vir leer sowel as sintetiese stewels. Nikwax is ’n uitstekende behandeling en waterdigting.

Versorging stappe:

1. Was jou stewel met koue water (net aan buite kant). Gebruik ’n lap of sagte borsel.

2. Laat dit vir ’n dag staan om behoorlik droog te word (nie in direkte sonlig nie), verkieslik binnehuis.

3. Wend behandelingsmiddel (byvoorbeeld Nikwax) aan met ’n sagte spons, volgens voorskrif. . Die stewel sal nat word van die middel en die kleur sal donker word. Gee spesiale aandag aan nate en vaswerkplekke.

4. Laat stewel binnehuis staan om droog te word vir twee tot drie ure. Selfs ’n dag sal goed wees. (Meer as een laag mag nodig wees, sien gebruiks aanwysings. Herhaal stap 3 en 4 vir elke laag).

5. Nadat die stewel behoorlik droog is poleer liggies met ’n sagte lap.

Stapkouse:
Die nuwe stapkouse wat mens deesdae kry is nie meer so dik soos die ou wol stapkouse nie. Falke Coolmax stapkouse is ontwerp vir voetslaan, dit is gemaklik, hou die voete droog, koel in die somer en hou die voete warm as dit koud is. Dit hou letterlik die sweet weg van jou vel. Die grootse voordeel van Falke Coolmax kouse, dit is nie so dik nie, baie gemaklik en dit beskerm die voetsool teen blase.
 Falke Coolmax produkte is gemaak van herwinde plastiek bottels en mens lewer sommer 'n bydra tot 'n groener omgewing deur Coolmax produkte te koop.

Falke Coolmax produkte: 43% PAC 20% Comfortel 12% Wool 13% polyamide 10% Cotton 2% Elastane

Na Bo