TUISBLAD INLIGTING KONTAK ONS ROETES VIR DIE JAAR
	Naukluft Voetslaanroete 121km

Ligging:
Die Naukluft Voetslaanroete is ongeveer 130km Noord-Wes van Maltahohe in Namibië. Neem die C14 roete vanaf Maltahohe ry Noord-Wes vir 110km en draai links in die D854. Na 8,6km draai regs by die Naukluft ingang.

 GPS hddd.ddddd    S24.22618 E16.33770

Algemeen:
Die Naukluft Voetslaanroete is 'n 8 dae sirkelroete van 121km. Die roete begin by Hikershaven hut en eindig weer daar. Die roete kan ook in 4 dae vanaf Hikerhaven tot by Tsams Ost gestap word. Voertuie kan by Tsams Ost gelos word.
Die oornaggeriewe is slegs skuilings en daar is 'n puttoilet en water. 'n Skuiling is baie basies, slegs vier mure en 'n dak. By Ubusis is daar 'n oornaghut, stapelbeddens met sponsmatrasse. Die roete kan 12 stappers vat, maar a.g.v. beperkte spasie sou ek slegs 10 stappers aanbeveel. Die roete word aangedui met wit voetspoortjies en is duidelik gemerk. Na 'n goeie reën seisoen kan die spoortjies toegegroei wees, maak seker en soek die spoortjies. Ekself beskou die Naukluftroete as 'n wildernisroete met basiese geriewe. 
Verder is daar baie moeilik plekke wat op of af geklim moet word en by alle moeilike plekke is kettings aangebring wat help met die klim. Die Naukluft is 'n uitdagende en 'n avontuurlike roete.

         
Hikershaven (GPS: S24.26331 E16.23884)       Parkeer voertuie by die kantoor                Voetspoortjies dui die roete aan

Dag 1 Hikershaven na Putte Skuiling (14 km)
Die roete begin by Hikershaven en die eerste ent word die Naukluftrivier gevolg, waarna Heartbreak Pass volg met ongeveer 200 meter opdraande. Ongeveer halfpad kry mens water in Fonteinkloof. Helderskoon en drinkbaar, werklik 'n lieflike plek vir teetyd of middagete. Vanaf Fonteinkloof is nog 'n opdraand tot by Crassula Corner met 'n lieflike uitsig.
Die Putte het sy naam te danke aan die put waaruit mens water pomp met 'n wielpomp.

   
     
   
   
Putte Skuiling                           Slaap op 'n gruisvloer                           Draai 'n pomp vir water

Dag 2 Putte Skuiling na Ubusis-hut (15 km)
Die eerste 9km bly die roete op die plato en ons het volop wild hier gekry, Gemsbok en Sebra. By Bergpos is 'n baie duidelike windpomp as baken.Vanaf hier gaan die roete af in die pragtige Ubusiskloof. Vyf verskillende plekke is kettings aangebring om die klim te vergemaklik. Werklik opwindend om met die kettings af te klim. LW op een plek is daar twee alternatiewe kettingroetes, as jy 'n ketting vind wat in 'n diep poel water eindig, kyk na regs, daar is 'n roete regs om die poel. Baie stappers het al hier omgedraai, kyk mooi, daar is 'n alternatief. By Ubusis hut is spoeltoilette, windpompwater in die hut of tydens goeie reën is daar water in die stroom reg langs die hut. Die Ubusiskloof is seker een van die mooiste klowe waarin ek was.

   
   
Windpomp naby die dag 2 en dag 3 aansluiting

                   
                                                                        Ubusishut
 

Dag 3 Ubusis-hut na Adelerhorst Skuiling (12 km)
Die eerste 6 kilometer is weer terug op gister se roete en op met die Ubusis kloof en op met die kettings. Daarna is die roete redelik gelyk op die Kuduvlaktes tot by Adlerhorst Skuiling.

           
                                                                          Water pomp                                     Adlerhorst Skuiling 

Dag 4 Adlerhorst na Tsams-Ost Skuiling (17 km)
Die eerste paar kilos is redelik gelyk voor mens in die Tsamsrivierkloof ingaan. 'n Entjie in die kloof in is ‘n grot of rotsskeur en aan die einde van hierdie grot is ‘n nou tonnel waar mens rugsakke moet afhaal en voor jou deur stoot. Baie interessant en avontuurlik. Na 'n paar kilos in die Tsamsrivierkloof klim mens weer uit die kloof en klim dan weer terug om verby die waterval te kom. Sover ek kon vasstel het die waterval nie 'n naam nie, so ek noem dit die Tsamsrivierwaterval. Sover ek kon vasstel loop hierdie waterval slegs tydens 'n 100 jaar vloed. Ons was gelukkig om hierdie waterval te sien na 2011 se baie reëns en vloede en dit het pragtig geloop, ons het selfs in die watervalpoel geswem.
Na die waterval is dit nog 'n paar kilos in die kloof en die laaste twee kilos is met die toegangspad tot by Tsams Ost Skuiling.

                    
Tsamsrivierwaterval vloei  slegs tydens 'n buitengewone vloed (foto's April 2011)

  
 
Tsams Ost Skuiling
Let op die twee groen kaste, mens kan voor die stap soontoe ry en voorraade daar gaan toesluit. Daar is selfs 'n slot en sleutel. Ons het dit gedoen en dit het uitstekend gewerk.

Dag 5 Tsams-Ost na Die Valle Skuiling (17 km)
Die roete begin dadelik met die 300 meter Broekskeur opdraande, daarna volg dit die riviervallei tot by die Valle.Dit is ietwat van 'n oninteressante dag. By die Valle Skuiling was 'n waterkar vol water, want dit lyk of die pomp en die sonpanele gesteel is.

           
                                                     Die Valle Skuiling

 Dag 6 Die Valle na Tufa Skuiling (16 km)

Dit was die moeilikste dag, veral vir die voete. Op met die Groot Hartseer opdraande tot aan die bokant van Die Valle waterval (200 meter). Dan is dit verder op in die pragtige Vallerivierkloof verby die tufa grotte. Tufa is versteende mos en kalksteen. Baie mooi. Ons stap verder op in die rivierbedding (boulders op boulders) verby 'n wildevyboom wat teen die rotse groei. Baie mooi. Verder op, nog boulders en dit wil net nie end kry nie. As jy eers bo is sak die roete weer af tot by die Tufa Skuiling. Ongeveer 580 meter op en af. Aan die oorkant van die rivier is 'n handpomp vir water, of as die rivier loop kan mens in die rivier water kry.

              
                                                                                           Tufa Skuiling

Dag 7 Tufa na Kapokvlakte Skuiling (14 km)
Die roete begin oorkant die rivier by die waterpomp, die eerste entjie is redelik gelyk, dan draai mens op in 'n baie styl kloof. Hierdie kloof het nie 'n naam nie en ek noem dit sommer Kettingkloof. Kettingkloof klim nogal moeilik en dit het heelwat verander a.g.v. verspoelings sedert die vorige kere wat ek die Naukluft gestap het. Daar is 'n paar kettings om te klim voor mens by die hoogste ketting op die roete kom. Dit is om verby die "Kettingkloofwaterval" te kom. In April 2011 het ons hier gedeeltelik in die water geklim en was dit nat en glad. Die gedeeltes wat nie in die water was nie was klam en vol groen slyk, maar die rots het oral skurwe vastrapplekke en kon ons redelik gemaklik vastrap en veilig tot bo klim. Die regte stewels is hier van uiterste belang. Dag 7 se kettingklim is 'n groot avontuur en sekerlik een van die redes hoekom ek die Naukluft weer en weer sal stap. . Die totale hoogte styging om tot bo op die plato te kom is net oor 500 meter. As jy eers bo op die plato is, stap mens na Bakenkop en al die pad het mens 'n lieflike uitsig oor die Tsondabriviervallei. Die voetpad bo op die kapokvlakte is vol klippe, vulkaniese rotsstukke en loop baie moeilik. Hier is seker die meeste springbokke wat ek nog in my lewe gesien het. Oral is waterpanne (in die reën seisoen) en volop wild. Die Kapokvlakte Skuiling is die middel van die Kapokvlake-plato. 

   
Kettingkloof

   
Ketting is nat en in die slyk.

 
Op met die kettings, leerhandskoene is 'n sterk aanbeveling vir die nat kettings.

            
Bakenkop                                         Springbokke                                                 Waterpan

   
Kapokvlakte Skuiling (en pasop vir die perdebye)

 
Teen skemeraand het 'n hiëna sy opwagting gemaak en sy nekhare dik gemaak vir een van die dames digby die skuiling, maar gelukkig nie nader gekom nie. Daardie nag was seker een van die mooiste aande in my lewe, omring met die klank van hiënas en jakkalse. Gebruik gerus die plank-deur om die skuiling toe te maak om 'n honger hiëna uit te hou.

Dag 8 Kapokvlakte na die einde by Hikershaven (16 km)
Die eerste gedeelte is op die kapokvlakte se Never Ending Hills en dan af langs die Naukluftrivierkloof. In die Naukluftrivier is die pragtigste rotspoele vir 'n heerlike swem. Die roete eindig by Hikershaven, dieselfde plek as die beginpunt.

Opsomming:
Die Naukluftroete kan beskou word as een van die grootste roetes is Suidelike Afrika, 121km oor agt dae maak dit die langste roete. Dit is 'n moeilike roete en 8 dae se kos om saam te dra is nie maklik nie.
Verder is dit 'n pragtige roete vol avontuur en opwinding. Dit is juis die opwinding en adrenalien van die kettingklim in die klowe wat maak dat mense die Naukluft wil stap.
Die Naukluft is 'n moet vir elke ernstige voetslaner en nie vir persone met hoogtevrees nie.

Foto's: Grobbies Grobler, Andries Roesch, Dave Roux, Annatjie Janse v Rensburg, Coert Grobbelaar, Andries Oosthuizen,
JC Oosthuizen,  Wilma du Plooy en Japie Brand.